Valkyrien Allstars leverte ein flott solefallskonsert. Foto: Nils Rogn

Bortimot 600 hadde teke sjansen på at regnet ville halde seg unna, og hadde funne seg ein plass i lyngen når varaorførar Lars Kvissel helsa alle velkomne. Han helsa også sola velkomen, men minna om at mørkret også var tilstades i desse dagar. Han oppmoda alle som kunne å delta i minnemarkeringa etter ofra i Oslo og Utøya som skal arrangerast på Skiferplassen klokka 19 onsdag kveld.

Så sette tre hardingfeler, bass og slagverk i gang. Valkyrien Allstars veksla mellom det vare og såre til hard rockefot i repertoaret. Publikum var godt med og let seg begeistre. Me fekk høyre tekstar frå blant andre velmeinande og oppdragande Margrethe Munthe, lyrikaren Olav H. Hauge og frå vokalist Tuva Syversen. Frå den folkemusikalske skattekista kom stev og låttar, og dei hadde også eit par melodiar dei omtala som coverlåtar.

Tuva Syvertsen levde seg inn i musikken. Foto: Nils Rogn

Den eine av desse hadde dei frå ”min største favorittduo i heile verda”, som Tuva uttrykte det – Sudan Dudan. Marit Karberg og Anders Røine har gjeve ut eit par CDar under dette namnet. Den andre var teke frå gruppa Kjøtt – ”Nå vil eg ikkje leke med teitingene mer”.

Med dette er Hilme-stemnet godt i gang. Konsertane kjem tett utover veka og i helga, og det vil bli høve til å høyre kappleikspel og sjå framifrå danseprestasjonar. Ikkje minst blir det  store dansekveldar på Valdres Folkemuseum. Les om programmet her.

Publikum kosa seg. Foto: Nils Rogn

Solstrålane leika seg i Movatnet ved Jaslangen. Foto: Nils Rogn