Else har tidlegare hatt hytte i Vestre Slidre, men då denne brann ned for nokre år sidan, fall auga på ded nesten nedfalne selet på Kinnholt. Inga oppgåve ser ut til å vere for vanskeleg for Else, og no står selet der ferdig restaurert. Huset er eigd av Ola og Astrid Nordli, og Else får bruke huset i 10 år til avtala skal reforhandlast.

Mykje folk deltok på opninga. Foto: Katharina Sparstad

Dei som såg huset før ho gjekk i gang med tiltaket,  hadde nok ikkje sett for seg det dei ser i dag. Tiltaket har nok utfordra både byråkrati og lokalbefolkning. Men for Else som har via mesteparten av livet til restaureringsarbeid, gjekk dette veldig greitt.  Ho har også fått med seg naboar og vener på dugnadar, og mykje frivillig innsats er lagt ned i «gjenreisinga» av selet.

Som takk for dette vart alle som har vore involvert i tiltaket invitert til ein opningsmarkering. Antrekket skulle vere som budeie eller handverkar kring 1800-talet. Dette hadde dei fleste tatt til følgje, og dei ca. 75 frammøtte gav saman med  bygning og stølslandskap eit nostalgisk preg.

Andris Hemsing spelte hardingfele ved opninga. Foto: Katharina Sparstad

Til stades på opninga var også sjølvaste Riksantikvaren, Jørn Holme. Han skulle klyppe bandet ved den formelle opninga. Det var ei stor ære at han la turen innom Valdres i eit elles svært travelt program. Han nøgde seg heller ikkje berre med å klyppe snora, men nytta spontant høve til å koma med lovord til prosjektet og Else Rønnevig. Kulturvernet treng både hjarte og eldsjeler, og Else Rønnevig har båe delar. Han nytta også høvet til å rose Valdres for arbeidet i Verdiskapingsprogrammet på Kulturminneområdet.

I tillegg til han, held varaordførar i Vestre Slidre,  Lars Kvissel, kulturkonsulent i VNK, Katharina Sparstad, formidlingsansvarleg ved Valdresmusea Ole Aastad Bråten og bygningsvernrådgjevar Odd Arne Rudi ei helsing.

Tiltaket er støtta av Valdres Natur- og Kulturpark og Norsk Kulturminnefond gjennom Verdiskapingsprogrammet på Kulturminneområdet.  Delar av restaureringa har vore organisert  gjennom kurs i samarbeid med Valdresmusea og Valdres Natur- og Kulturpark og ”Heime og på støle” - prosjektet i Vestre Slidre.

Bjørkheimstølen. Foto: Katharina Sparstad

Kulturkonsulenten presiserte at det var takka vere eldsjelar som Else Rønnevig at Verdiskapingsprogrammet vart vellukka.  Utan eldsjeler og engasjement skjer det ingen ting. Samstundes har Bjørkheimstølen viktig dokumentasjonsverdi. Else skal mellom anna lage ei bok om staden,  og gjennom alle kursa som har vore her, har mange fått høve til å bli kjent med byggeskikken i Valdres og restaureringsteknikkar.  Her har det blant anna vore kurs i tørrmuring, vindauge, taktekking, og gamle gjerdeteknikkar.

Budeiemøte ved stølen. Foto: Katharina Sparstad

Tiltaket har også vore eit kroneksempel på koordinering av verkemidlar på tvers av sektorer.

Sjå link til film frå Verdiskapingsprogrammet og restaureringsprosjektet her

Fyldig bildeserie finn du på Flickr