Etter at Vinjerock vart utseld på rekordtid har festivalen alliert seg med påskeharen for å gje billettlause Vinjerockarar moglegheita til å jakte på ein plass i sola til sommaren. Jaktsesongen startar høgt til fjells skjærtorsdag og avsluttast i låglandet 2. påskedag. – Dette er rett og slett ei god, gamaldags påskeegg-jakt. Me krev rettnok at du må røre litt på deg, men slik eg kjenner «Vinjerockarane» er det det minste problem i verda, meiner festivalsjef Eirik Høyme Rogn.

Nye gøymestader kvar dag

Kvar dag blir det nye oppgåver ein kan bryne seg på, og den som er ute etter ein plass framfor scena i Jotunheimen må rekne med både hjernetrim og fysisk aktivitet for å finne godsakene. – Kvelden i førevegen vil me legge ut kart, navigasjonskoordinatar eller rebusar på Facebook-sida vår for å gje leietrådar til kor ein kan finne egga. Dermed kan ein kan ein bruke kvelden til å finne ut kvar haren tek turen dagen etter, seier PR-sjef Turid Lindboe Reite.

Jaktstart ved to-tida

Sidan arrangørane helst ser at folk ligg i sengene sine framfor å flyge ute i fjellheimen på nattetid, er det ingen egg å finne før litt ut på dagen. – Vinjerock handlar om å kose seg i lag med andre fjellfantar, så me oppmodar folk til å finne påskeharen, slå av ein prat og ha det kjekt i lag med andre «jegerar». Eggjakta blir offisielt sett i gang på den aktuelle staden ved to-tida kvar dag, forklarar PR-sjefen.

Oppmodinga frå Vinjerock-gjengen er klar: Fyll sekken med sjokolade, kakao og appelsinar, ta eit ekstra blikk på Fjellvettreglane, og kom deg ut på jakt.