Uggint

Surt vêr

Surrealistisk realisme på Piltingsrudlåven

Ståande applaus til Juni Dahr og Gard B. Eidsvold for ei fantastisk l(o)åve-oppleving. Foto: Nils Rogn

laurdag 12. juni 2010 10:02, Nils Rogn

I 1920 tok Knut Hamsun i mot Nobelprisen i litteratur for boka Markens Grøde. Boka om nybrottsmannen Isak og Inger med hareskåret har fasinert og fenga mange. Låveversjonen til skodespelarduoen Juni Dahr og Gard B. Eidsvold, gjorde det same på Piltingsrud fredag kveld.

Godt å koma inn i regnveret! Foto: Nils Rogn

Sørre delen av låven var omgjort til ei teaterscene med tribunar over fôrbrøta. For å få plassert alle måtte skodespelarane dirigere og instruere, og til slutt vart det akkurat plass til alle dei 200 frammøtte. For ein som likar det visuelt realistiske baud starten av spelet på utfordringar. Europallar og plank låg spreidd utover låvegolvet, og i lufta gjekk ein løypestreng over heile scenen. Opplegget minna om regien i Lars von Trier-filmen Dogville.

Dyktig dramatisering

Men etter kvart fekk skodespelarane fram eit veldig visuelt bilde på livet på Sellanraa, garden dei to bygde opp. Dyrebjøller på strengen klang og fortalde om svoltne dyr og gradvis auke

Ei totaloppleving! Teater og god mat og drikke. Foto: Nils Rogn

både i artar og antal. Små barnestøvlar var symbolet på borna som etter kvart vart fødde. Regien fekk fram bilde hjå oss tilskodarar med bygging av hus og slitet med jorda.

Humor

Men oppi alt slitet fekk også dei to fram humor ved gjenkjennelege personkarakteristikkar. Isak med sine fåe ord, men svært så talande fakter, og Inger med sine måtar å takle dei ulike situasjonar. Om det har gått meir enn 90 år sidan boka vart skriven, har ho framleis aktuelle bodskap å koma med. Bodskap som det kan vera godt å bli minna på, ikkje minst dette at det er jorda me lever av. Mange bønder i låven var det nok som nikka attkjennande til ein del av problematikken som vart reist.

Dyktig vertskap - Rasmus Piltingsrud og Bjørg Strandbråten. Foto: Nils Rogn

Etter ståande applaus var det høve for fôring nede i det gamle fjøset. Vertskapet Bjørg Strandbråten og Rasmus Piltingsrud serverte i samarbeid med Valdres Mathus og Småvesen bryggeri, kortreist mat og god drikke i ein utsøkt kombinasjon.

Det er billettar att både laurdag og søndag, så nytt høvet til ei unik oppleving av teater, mat og bruk av gamle, majestetiske bygningar! Les om forestillinga her.