Men med interesse for fjell, blir det mest frå dei høgareliggande områda i regionen, vedgår Helgesen. Her er det at du som fotograf kan bli med å balansere litt på dette. Om du held eit bra nivå, er det ikkje noko problem å få tilgang til å legge ut bilde på sida. Det er berre å sende over nokre eksempel , seier Morten Helgesen.

Salskanal

- Valdres i bilder skal fungere som eit bildearkiv for Valdres. Her skal ein kunne finne bilde frå dei fleste område, og er ein på jakt etter spesielle illustrasjonsmotiv, vil nettsida også vera ein salskanal for fotografane. Det viser seg ofte at det er tilgjengelegheit meir enn kvalitet som gjev sal. Med denne nettsida håpar me å tilfredsstille begge delar, meiner Helgesen.

Mange utgjevingar

Det er interesse for fotografering, fjellet og det å dra i gang ting som har fått Morten til å lage denne nettsida. Men han har også drege i gang – og fullført – mange andre saker. Gjennom Glittertind Forlag som han og kona Julia driv i lag, har dei gjeve ut fleire bøker og kalendrar. I haust jobbar han med ei ny Valdresbok. Denne er meint for ryggsekken, og kombinerer dei fleste turformer.

Ny turbok for Valdres

Planen var å treffe julesalet, men det blir våren i staden. – Me har rett og slett inga sjanse til å få ferdig boka på ein forsvarleg måte før jul, og har utsett utgjevinga. Sidan det difor ikkje er noko julesal å stresse mot lenger, tek me den tida me treng og satsar på utgjeving i mars-april 2011. Dette blir ei heilårsbok, med beskriving av fot-, ski-, sykkel- og kajakkturar lagt opp kommunevis, fortel Helgesen. Boka har også med GPS-koordinatar slik at det blir enkelt å finne fram. Karta blir av høg kvalitet.

Fleire nettsider

Som om ikkje dette var nok driv Helgesen også nettstaden Norges fjelltopper over 2000 meter. Her får du ei alfabetisk liste over alle toppane, med  GPS koordinatar og vanskegrad for den som vil til topps. Nettstaden baserer seg på boka med same namn.