Flaumstein ved Strandefjorden

Ein minnestein over flaumhøgder finn du ved Strandefjorden i parken ved Rådhuset på Fagernes. Steinen syner kor høg vasstanden har vore under storflaumane frå 1789 til 1967.

Bronsealderfunn på Svennes

Ein minnestein er sett opp på Svennes i Nord-Aurdal for å fortelje om eit stort bronsefunn frå bronsealderen, Svennesfunnet, og ei kyrkje som sto på Svennes fram til 1860. Steinen står på oversida av E 16 nord for Svennes Camping.

Det er også funne ein mellomaldergravstein ved Svennes stavkyrkje i 1986. Steinen hadde opphavleg vore ein gravstein frå 1200-tallet. Liknande steinar er funne ved Mo kyrkjeruin og ved Hegge kyrkje.

Svennesfunnet er det største depotfunn frå eldre bronsealder i Noreg, og inneheldt 20 spydspissar og 1 sigd. Funnet vart gjort i 1830, og gjenstandane ligg no ved Universitetets oldsakssamling i Oslo.

Valdresbanen 1906 - 1988

Jernbanen frå Eina til Fagernes, 109 km, vart opna i 1906. Valdresbanen var privatbane til staten overtok drifta i 1937. Det siste damplokomotivet var i bruk i Valdres til 1968. I 1988 vart trafikken på Valdresbanen innstilt, og det siste ordinære toget drog frå Fagernes 31. desember 1988.

I 1991 vart dei fire kilometrane med skinnegang frå Fagernes til Leira fjerna. Leira stasjon vart då endepunktet på Valdresbanen. Det private A/S Valdresbanen køyrde ein gong i blant turisttog og dreiv utleige av dresinar på Leira.

Skinnene frå Leira til Bjørgo vart fjerna i 2002, og sidan då er A/S Valdresbanen si verksemd med turisttog og dresinar flytta til Dokka.

Eit skiftelokomotiv av typen Skd 214 bygt ved Kockum i Sverige i 1952, med ei vekt på 20 tonn, var i bruk på Fagernes stasjonsområde heilt til trafikken vart innstilt. Saman med stasjonsbygningen frå 1906, skal dette skiftelokomotivet markere at Fagernes ein gong var ein stasjonsby.

I dag er den gamle jernbanetraseen døypt til Valdresbanevegen og fungerer som gang og sykkelveg.