Lokalmatmarknad som opptakt til Rakfiskhelga

24. oktober 2016

Med over 20 lokalmatprodusentar, dugnadsmannskap frå Valdres FK og kokk Erling Theodorsen er alt klappa og klart til ein spanande lokalmatmarknad. - Dette blir moro, seier Håvard Halvorsen frå Norsk Rakfiskfestival, Henning Wangsnes frå Valdres Natur- og Kulturpark og Guri Grønolen frå Fylkesmannen i Oppland.

I år blir det eit ekstra fokus på mat frå Valdres. Både torsdag og fredag vil over tjue lokalmatprodusentar by fram varene sine i smaksteltet på Skiferplassen. Denne lokalmatmarknaden starta opp torsdagen i fjor, og blir etter suksessen då utvida til å omfatte også fredagen på årets Rakfiskfestival. Som i fjor blir det dessutan lokalmatrestaurant inne i teltet, der kokk Erling Theodorsen diskar opp velsmakande, lokale rettar.

God marknadsføring

Guri Grønolen ved fylkesmannen i Oppland/Valdres Natur- og Kulturpark er koordinator for marknaden, og ho fortel at det var dei gode tilbakemeldingane i fjor som gjorde at lokalmatprodusentane no får to salsdagar i teltet. – Dei sette pris på å få stå inne i eit varmt telt, dei likte at det var ei roleg og god stemning med rom for ein god prat med kundane og dei såg det som ei god marknadsføring, fortel Guri.

Kollegalunsj

Som i fjor blir arbeidsplassar oppmoda om å ta ein kollegial lunsj i teltet. – ”Ta med ein kollega til lunsj” – kampanjen i fjor slo godt an som ei triveleg avveksling til den daglege lunsjen eller nistepakka, seier Guri. Ho fortel at Valdres fotballklubb stiller med seks personar som hjelpemannskap i teltet. – Me treng hjelp ved inngangen, i kassa og til rydding og reinhald. Sidan VNK har ei partnarskapsavtale med fotballklubben, stiller dei med mannskap desse to dagane.

Julemat

Lokalmatmarknaden vil vera ein flott opptakt til sjølve rakfiskhelga, og eit ypparleg høve til å sikre seg det ein treng av lokalmat framover mot jul. – Ja, her får du ei rolegare handleøkt enn i kaoset laurdagen. I tillegg får du god kontakt med produsentane, meiner Guri Grønolen som fortel at varespekteret spenner frå bakevarer,  ulik type kjøt m.a. viltkjøt, fjellgris og kjøt frå boergeit, kurv og anna spekemat, fisk, ostar og andre meieriprodukt, gelear, urter og øl.