Viktig vegmøte
27. juni 2016
Åge Skinstad frå NHO Innlandet og Guttorm Tysnes frå Norges Lastebileier- Forbund Hedmark og Oppland, deltok sist onsdag på eit møte med lokale vegforkjemparar om E16.
Etter at dei nasjonale organa i båe organisasjonane hadde gått inn for andre vegalternativ mellom aust og vest enn E16, tok regionleiar Inger Torun Klosbøle kontakt med dei to lokale leiarane for ei samtale om vegsituasjonen.
- Møtet var svært konstruktivt, og viste at NHO Innlandet og NLF Hedmark og Oppland er med oss i ynskje om fullføring av E16, seier dagleg leiar i Valdres Natur- og Kulturpark, Jørand Ødegård Lunde. – Båe la vekt på den betydninga E16 har for næringslivet i Innlandet, og at denne vegen i overskodeleg framtid vil vera den mest sikre vintervegen mellom aust og vest, legg ho til. Frå NHO deltok og politisk rådgjevar Jan-Bertil Lieng.
I møtet presenterte Vidar Eltun, ordførar i Vang og leiar i Stamvegutvalget, tala for utbyggingskostnadane ved å fullføre E16. Det er klart at å fullføre E16 er det raskaste og billigaste alternativet for å få eit godt samband mellom aust og vest.
