Stamvegsynfaring 1. og 2. september
23. august 2016
Ved førre stamvegsynfaring i juni 2012 var det ei større markering ved Kvamskleive for å få fortgang på arbeidet med tunnel forbi her. Fire år etter har lite skjedd. Foto: Nils Rogn
Tradisjonen tru arrangerer Stamvegutvalget ei synfaring langs E-16 kvart fjerde år. Dette for at nye representantar i det fyrste kommunevalåret, skal bli oppdatert om status og planer langs stamvegen.
Det er no fire år sidan siste synfaring, og 1. og 2. september går årets tur frå Bergen mot Sandvika. I Bergen vil ordførar Marte Persen ynskje alle velkommen til byen, før stamvegleiar Vidar Eltun overtek roret og styrer forsamlinga mot aust. Langs stamvegen vil ordførarar eller andre fortelja litt om sine kommunar og aktuelle prosjekt.
1. dag Bergen-Fagernes
Etter å ha blitt orientert om strekninga Bergen-Voss, blir fyrste større stopp på Voss for ei matøkt og ei oversiktsorientering for strekninga Voss V – Gudvangen – Håbakken i Lærdal. Lærdalsstrekninga vil også få brei omtale, og ein vil få ei orientering om Kongevegprosjektet.
På Tyinkrysset blir det ein tur innom anleggskontoret der, for ei orientering om Filefjellprosjektet og planane vidare mot Fagernes. Dagen blir avslutta på Fagernes med middag og sosialt samvær.
2. dag Fagernes-Sandvika
Dagen etter fortsett forsamlinga mot Hønefoss etter ei oversiktsorientering over strekninga. På Hole heradshus blir det stopp for orientering av heile strekninga mellom Hønefoss og Sandvika. På bussen inn mot Sandvika busstasjon blir det orientert nærmare om dei enkelte vegprosjekt.
Knytte nettverk
Stamvegsekretær Arne Bang som har ansvar for opplegg og gjennomføring, fortel at det i alt blir med 34 personar på heile eller mindre delar av strekninga. Bang understrekar at ei slik synfaring er viktig for å knytte nettverk, og få ei viktig ballast for å forstå problemstillingane langs E-16. Dette er ikkje minst viktig for komande høyring av NTP.
